Koplazale elkarteak iragarri du aurtengo Zarauzko Kopla Txapelketaren data, baita bertan kantuan ariko diren bertsolarien izenak ere. Abenduaren 22an izango da, Putzuzulo gaztetxean, eta iazko garaile eta zintzarridun Andoni Egañarekin batera, ondorengo kideak igoko dira oholtza gainera: German Urteaga, Txiplas, Julio Soto, Oihane Perea, Danel Olano, Maddalen Arzallus, Miren Artetxe, Nerea Ibarzabal eta Aitor Mendiluze.
Sarrerak abenduaren 5ean erosi ahalko dira, 18:30ean, Musika plazan. Sarrerarik geratuz gero, Durangoko Azokan jarriko dituzte salgai, Bertsozale Elkartearen postuan.