Ekainaren 4tik urbanizazio lanak egiten ari dira Santa Barbara auzoan, Mendibeltz ur biltegiaren ondoan transformazio zentro elektriko berria instalatuko baitu Iberdrolak. Udalarekin hala hitzartua du, eta martxan da proiektua.
Urbanizazio lanek bi hilabete iraungo dituzte, udalak azaldu duenez. Linea elektriko berria jartzeko beharrezkoak dira lan horiek, eta Construcciones Otegi Gaztañaga S.L. enpresak egingo ditu. 122.352,83 euroko aurrekontua du, eta Iberdrolak zati bat ordainduko dio udalari. Zehazki, 40.990,98 euro.
Txakolin ekoizleentzat
Xabier Txurruka alkateak prentsa ohar bidez esan du helburua dela hobetzea Santa Barbaran ur eta argindar sarearen hornidura.
Gainera, gune horretan dauden txakolindegien beharrak azpimarratu ditu: "Azken urteetan, Santa Barbarako auzoak argindar horniduran gabezia jasan izan du, bereziki, txakolina ekoizten duten baserriek. Gainera, adjudikatutako urbanizazio lan hauek hornidura zabaldu eta finkatzea ahalbidetuko du, Santa Barbarako udal ur biltegia herriko sarearekin lotuko baita".