Datorren iganderako, apirilaren 7rako, Zingira basora irteera gidatua antolatu du udaleko Agenda 21 sailak. 10:30ean hasiko da txangoa, Eraztun Berde Urdinaren hasieratik (Aiten Etxe jatetxearen aurretik). Aranzadiko adituek azalpenak emango dituzte bidean zehar, bi taldetan banatuta; talde batean euskaraz egingo dute eta bestean gazteleraz. Guztira, irteerak hiru orduko iraupena izango duela kalkulatu dute.
Eraztun Berde Urdinaren gune "garrantzitsuenetako bat" Garate Santa Barbara dela azaldu du Gloria Vazquez Ingurumen zinegotziak. Duela hiru urte Zingira basoa erosi zuen udalak, eta pixkanaka-pixkanaka, berreskuratze lanak egin dituzte: pinuak kendu, zingira berreskuratu, arkamurkak landatu...
Irteera honen helburua "zarauztarrei basoan egindako lanak erakustea" dela azaldu du Vazquezek. "Herritarrak animatu nahi ditugu irteeran parte hartzera eta informazioa jasotzera, zuzenean, basoaren berreskurapen-lanetan aritu diren adituengandik".