Nikolas Illarramendi 19 urteko bizilagun zarauztarra gailendu da lehen aldiz jokatu den San Anton Bira itsas zeharkaldian, Getarian. Lehia estua izan da amaieran, uretatik atera eta helmugarako korrika-saioan: 00:21:48 denborarekin irabazi du Illarramendik, baina jarraian izan dira Luis Goñi 00:21:52rekin eta Xabier Gordoa 00:21:55ekin. Emakumezkoetan, berriz, Ana Vegak lortu du lehen postua 00:23:45 denboran, bigarren izan da Nerea Santos 00:24:31 denborarekin eta hirugarren Usoa Ostolaza izan da 00:25:22ko denborarekin.
Hiru ordu laurdeneko atzerapenarekin hasi da itsas zeharkaldia. Izan ere, Gaztape hondartzatik Malkorberaino egin behar zuten 321 parte hartzaileek, baina itsaso nahasia medio, antolakuntzako kideak sorosleekin bildu dira; ondoren eman dute ibilbide berriaren berri: Malkorben hasi eta bukatu da proba.