Zarauzko Udaleko Parekidetasun departamenduak Indarkeria Matxistari Buruzko IV. Jardunaldiak antolatu ditu azaroaren 20rako. Komunikabideetan eta sare sozialetan jarriko dute aurten begirada morea, izenburuan bertan zehaztu dutenez: Indarkeria matxistaren tratamendu mediatikoa. Indarkeria bultzatzen ari ote gara...?
Jardunaldia hiru hitzaldik eta amaierako saioak osatuko dute, eta goiz partean eskainiko dute guztia. Bi hitzaldi euskaraz izango dira, eta bat gaztelaniaz. Jakinarazi dutenez, itzulpen zerbitzua egongo da. Hizlariak eta gaiak hauek izango dira:
- 09:15: Aurkezpena
- 09:30-10:30: Bortxaketaren kultura deszifratzen (euskaraz). Samara Velte Moran. Kazetaria, feminista, idazlea, ikerlaria Euskal Herriko Gizarte eta Komunikazio Zientzien Fakultatean eta Nik sinesten dizut liburuaren idazlea.
- 10:30 – 11:30: Ziberrindarkeria matxistak 3.0 (euskaraz). Estibaliz Linares Bahillo. Gizarte Lanean graduatua eta Emakumeen kontrako indarkerian esku hartzeko masterra egina. Giza eskubideak: erronka etikoak, politikoak eta sozialak Deustuko Unibertsitateko programan doktorea. Generoaren hirugarren arraila nerabezaroan azterlanaren egilea.
- 11:30 -12:00: Atsedena-kafea.
- 12:00-13:00: Premiazkoa da indarkeria matxistaren aurka borroka egitea (gaztelaniaz). Jose Maria Fernandez Calleja. Informazio Zientzietan doktorea eta Historian Lizenziatua, Kazetaritza irakaslea, ikerlaria eta idazlea. Como informar sobre la violencia machista liburuaren egilea.
- 13:00: Clownklusioak, Oihulari Klown antzerki taldearen eskutik. Virginia Imaz Quijera. Pailazo profesionala, Oihulari Klown antzerki taldearen sortzailea eta Berdintasunaren Aldeko 2017ko Emakunde Saria.
Izen-ematea
Urola Kostako Udal Elkartean izango da jardunaldia, eta parte hartzeko beharrezkoa izango da aurrez izena ematea, toki mugatua baitago. Horretarako hiru bide jarri dituzte:
- Korreo elektronikoz: berdintasuna@zarautz.eus
-
Webgunetik: www.berdintasunazarautz.wordpress.com
- Telefonoz: 943-00 51 17
Komunikabideen eragina
Parekidetasun departamenduaren ustez, "zientzia sozialek frogatu dute komunikabideek eta sare sozialek eragin handia dutela gizartearen jarrera eta jokabideetan. Funtsezkoak dira informazioaren transmisioan eta iritzi sortzaile modura. Beren mezuak zabaltzeko moduak berdintasunezko kultura eta kultura parekidea bultzatu dezake zenbait kasutan, edo beste zenbaitetan, kultura hegemoniko eta heteropatriarkala sostengatu".
Indarkeria matxistarekin lotutako berriek "desberdintasun-egoera salatu beharko lukete, emakumeen aurkako indarkeria guztiz arbuiatu, eta horrelako indarkeria desagerrarazteko konpromiso etiko eta soziala izan". Hala ere, nabarmendu du udalak oraindik agertzen direla "erasotzailearen erantzukizuna lausotu edo ezkutatzen duten titularrak edo biktima bera erruduntzat jotzen laguntzen dutenak". Horrez gain, gogoratu du sare sozialetan nahiz whatsapp bidez mezu matxistak eta erasoak ageri diren bideoak partekatzen direla.
"Horrelako indarkeria desagerraraztearekin konprometitutako informazioak lagundu egin beharko luke kritika kolektiboa eta soziala bultzatzen eta berdintasunaren aldeko iritziak sortzen".
Hain zuzen, azaroaren 20ko jardunaldian gai horiek eztabaidatu eta aztertuko dituzte.