ZARAUZKO HITZAren zuzendaritzak eta TOKIKOMen Administrazio Kontseiluak, herritarren arteko komunikazio tresna eraginkorra izateko eta zerbitzu publikoa betetzeko funtzioa betetzeko bokaziotik, eta gertuko komunitatearekiko konpromisotik, bere egiten dute salbuespenezko egoera honetan herritarrak zehatz eta garaiz informatuta mantentzeko zeregina, eta krisi egoeratik irteten laguntzeko ekarpena egiteko borondate irmoa azaldu nahi dute. Hori dela eta, eskura dituzten baliabideak jarri nahi dituzte erakunde publikoen zerbitzura, zabaldu behar dituzten zerbitzu publikoko mezuak herritarrei helarazten laguntzeko.
Kazetaritza lanari dagokion behaketa kritikoari uko egin gabe, ZARAUZKO HITZAk eta TOKIKOMek beren ekarpena egin nahi dute krisi hau ahalik eta azkarren konpontze aldera, eta erabateko prestutasuna adierazten dute erakunde publikoei hedatu behar dituzten mezu informatiboak ahalik eta azkarren eta eraginkorren hedatzen laguntzeko, alerta egoerak dirauen bitartean.
Krisi honetatik onik ateratzeko modu bakarra gizarte eta komunitate osoaren konpromisoa eta elkarlan aktiboa den uste sendotik, beraz, ZARAUZKO HITZAk eta TOKIKOMek erabateko lankidetza eskaini nahi diote Zarauzko Udalari eta gainerako instituzioei, beti ere herritarrak egoki eta puntual informatu eta egoeraren larria ahal den neurrian leuntzeko asmoz.
Komunitate osoak elkar hartuta, egoerari buelta emango diogulakoan.
Zarautz, 2020ko martxoaren 14a
ZARAUZKO HITZAren zuzendaritzak eta TOKIKOMen Administrazio Kontseiluak