Adierazpen bateratua atera dute udal talde guztiek, eta hamabi konpromiso hartu dituzte indarkeria matxistarekin amaitzeko bidean

Emakumeenganako Indarkeriaren Aurkako Eguna dela eta, adierazpen instituzional bateratua argitaratu dute udal talde guztiek. Bertan, aurten Euskal Herrian hil dituzten lau emakumeak bereziki gogoratzeaz gain, hamabi konpromiso zehaztu dituzte, "herriak eta hiriak bizikidetza seguru, solidario eta berdinzalerako gune gisa indartu daitezen". Honako hau da helarazi duten testua:

COVID-19aren pandemiak gure bizitza eta komunitateak kolokan jarri ditu, pertsona guztien osasunari, segurtasunari, ongizateari eta komunitate-bizitzari erronka handia jarriz. Mundua ulertzeko eta bertan egoteko dugun modua aldatzen ari da. Konfinamenduak, mugimendu-murrizketek eta harreman-mugek agerian utzi dituzte, beren gordintasun osoz, indarkeria matxista mota desberdinei aurre egiten ari diren emakumeen egoera oso ahulak. Krisi-testuinguru guztiak, pandemia honekin gertatzen den bezala, indarkeria matxista ugaltzeko, biderkatzeko eta ugaritzeko haztegi izaten dira.

Indarkeria hori botere-harreman desorekatuen eta emakumeen aurkako diskriminazioaren adierazpen bat da, eta pairatzen ari garen krisi sanitario, sozial eta ekonomikoaren ondorioz, larriagotzen ari da. Pandemiak sortutako egoeran, arreta jarri behar dugu beren etxeetan, lanetan eta bizi-espazioetan bizirik irauteko indarkeriari aurre egiten ari diren emakume eta neskengan. Gizartearen aitorpen eta elkartasun osoa merezi dute. Testuinguru horretan, isolamendua, babesgabetasuna eta ikusezintasuna saihesteko baldintza egokiak sortzeko lanean jarraitu behar dugu. Horregatik, aurten Euskal Herrian hildako lau emakumeak gogoratu nahi ditugu bereziki gaur.

Errealitate mingarri horrek, gizarte gisa, eskatu egiten digu lanean jarraitzeko eta mobilizatzeko konpromisoa hartzeko, horrelakorik gerta ez dadin. Hala ere, horrekin EZ DA NAHIKOA. Konpromiso politiko argia behar dugu, gizarteak erakundeei eskatzen baitie emakumeen aurkako indarkeria matxista lehentasun politiko bihur dezatela.

Bada garaia, zerbitzu publikoen eta erakundeen laguntza eta baliabide guztiekin, emakumeei beren askapen-, berreskuratze-, ahalduntze- eta autonomia-prozesuetan laguntzeko. Eta ezinbestekoa da bizitza duintasunez eta segurtasunez bizitzeko eskubidea berreskuratuko badute emakumeek. Behar-beharrezko baldintza da, gainera, gure herriak eta hiriak bizikidetza seguru, solidario eta berdinzalerako gune gisa indartu daitezen. Herritarrengandik hurbil gaudenez, euskal udalok ahotsa jarri nahi diogu gure udalerriek emakumeekiko eta indarkeria matxistaren beste biktima batzuekiko duten elkartasunari. Gure erantzukizuna gure gain hartzen dugu, erakunde, kolektibo feminista eta emakumeen kolektibo, aditu eta gizarteko eragile guztiekin lankidetzan eta koordinatuta. Horregatik guztiagatik, Zarauzko Udalak konpromiso hauek hartzen ditu:

  • Zarauzko Udalak indarkeria matxista gure herritik desagerrarazteko lan egin eta beharrezkoak diren baliabideak jartzeko konpromisoa berresten du, gizartearen erdia zapaldu eta erasotzen duen indarkeria da eta.
  • Indarkeria matxistaren biktima diren emakumeen eskubideak arreta-prozesu osoaren erdigunean jartzea, haien beharrak eta eskaerak entzun eta aintzat hartuta, babeserako, arretarako, erreparaziorako eta berriz ez gertatzeko eskubidea bermatuko duten politika berriak diseinatzeko.
  • Behaketa hobetzea, indarkeria-egoeretan dauden emakumeen forma eta profil berriak hautemateko eta horien aurrean azkar jarduteko.
  • Indarkeria matxistaren edozein formari aurre egiten dioten arreta- eta laguntza-zerbitzuak mantentzea, hobetzea eta egokitzea emakumeentzat, ikuspegi konpontzailearekin, erakunde bakoitzaren eskumenen esparruan.
  • Horretarako, Zarauzko Udal honek murrizketarik ez egitea Parekidetasun Departamentuak 2021erako dituen aurrekontuetan, eta beharrezkoak diren partidak handitzea.
  • Emakumeen ahalduntzeari eta gazteen artean indarkeriaren prebentzioari laguntzeko programak bultzatzea, etorkizuneko indarkeria-egoerak eragozteko funtsezko tresnak diren aldetik.
  • Tokiko bizitzan berdintasun-programak zaintzea eta egonkortzea, emakume-kolektibo batzuen egoera ahulak areagotzen dituzten desberdintasunak areagotu ez daitezen borrokatzeko.
  • COVID-19aren krisiak emakumeen pobretzean eta kalteberatasunean duen eragina aztertzea, hartara, laguntza-jarduera espezifikoak diseinatu ahal izateko.
  • Herritarrei, eta bereziki emakumeei, dauden baliabideen gaineko informazioa eskuratzeko bideak eskaintzea, eta dagokion lurralde mailan, indarkeria matxistaren kontrako zerbitzu-sarearen funtzionamendua, elkarlana eta koordinazioa indartzea osasun krisiari egokituta, betiere, kontuan hartuz adin txikikoak eta biktimen seme- alabak.
  • Genero-ikuspegia txertatzea enplegu-galerak, diru-sarrerak eta krisiaren beste eragin negatibo batzuk arintzeko neurrietan; izan ere, eragin handiagoa izan dute emakumeengan, eta oztopo dira indarkeria matxistako egoeretatik ateratzeko.
  • Indarkeria matxista jasan duten emakumeen erreparazio-eskubidea lantzeko egungo egoerari egokitutako jarduera iraunkorrak martxan jartzea.
  • Erakundeen, udalen, foru-aldundien eta Eusko Jaurlaritzaren arteko lankidetza eta koordinazioa eskatzea, baliabideak bermatzeko eta beharrezko ekimen guztiak abian jartzeko, beren eskumenen esparruan.

Erakunde honetatik, hau da, Zarauzko Udaletik, borroka feministaren alde hartu dugun konpromisoa berretsi nahi dugu, indarkeriarik gabeko gizarte bat eraikitzeko bide eta tresna nagusia den heinean.  Halaber, EMAKUMEEN AURKAKO INDARKERIA EZABATZEKO EGUNA dela-eta Zarauzko Udalak antolatu dituen ekimenetan eta mugimendu feministak deitutako mobilizazioetan parte hartzera dei egiten diegu gure bizilagunei.