Aste honetan bertan aurkeztu du Donostian Ultima funcion lana Anjel Lertxundi idazle ezagunak, iaz plazaratutako Gilles de Rais eleberriaren gaztelerazko itzulpena. Alberdania argitaletxeko Jorge Gimenez Bechekin egin zuen aurkezpena, eta istorioaren nondik norakoak azaldu zituzten prentsaren aurrean.
Vincent izeneko antzerkilari frantsesa da kontakizunaren pertsonaia nagusia. Militar karlista baten enkargua onartzen du, eta izenez ere ozta-ozta ezagutzen dituen Nafarroako lurraldeetan barrena ibiliko da, berariaz sortutako antzezlan baten bitartez soldaduak Karlos VII.aren kausaren alde adoretzen. Gilles de Rais mariskal pedofiloak –Arc-eko Juanaren lagun eta armakideak– bere tokia erreklamatuko du pixkanaka-pixkanaka antzerkitik gero eta gutxiago duen obran.
"Mito faustikoa" dago eleberriko historiaren muinean, Lertxundiren arabera. Izan ere, Vincentek bere arima saltzen du diruagatik, baina ez deabruari, baizik eta militar karlista batzuei: "Modu ugaritan landu da literaturan Faustoren mitoa. Marloweren Faustok, adibidez, arima saltzen du jakituaren aldeko apustuan, baina Goethek giza sekretuak ezagutzeko grina asetzeko gogoa jartzen du Faustok deabruarekin egiten duen tratuaren sorburuan, eta, gure garaitik gertuago, arte gorena menderatzea darabil Thomas Mannek arima saltzeko arrazoitzat. Vincent, eleberriko protagonista, antzerkilaria da, Victor Hugo zalea eta artearen maitalea, eta diruaren truke saltzen ditu bere artea eta duintasuna".