LAB sindikatuko sei kide atxilotu zituzten astelehenean Iruñean, eta gertaera hori salatzeko elkarretaratzeak deitu dituzte gaurko hainbat herritan; tartean, baita Zarautzen ere. Dozenaka herritar bildu dira goizean Lege Zaharren Enparantzan, Borroka sindikal feminista aurrera zioen pankartaren atzean. Mobilizazioan salatu dute "polizia eta patronala eskuz esku" aritu direla operazioan, eta "bi protesta ekintza baketsu zehatzen inguruan antolatutako muntaia poliziala" izan dela. Gertaeren irakurketa hau egin dute: "patronala, aparatu judiziala eta polizia, gure ekintzak indargabetu eta zigortu nahian dabiltza".
Izan ere, LABek azaldu du "ekintza sindikal borrokalaria" egiten duela, eta "sistema kapitalista heteropatriarkala berrarmatu" egiten dela horren aurrean. Zehaztu dute bi ekintzetan emakumeak izan zirela protagonista, eta hori ere ez dela "kasualitatea". "Ezarritako ordena zalantzan jartzen ari gara eta garesti ordainduko dugula adierazi digute. Alferrik ari dira, ez dugu pauso bakar bat ere atzera egingo, ezta aldarrikapen bakar bat albo batera utziko. Sektore feminizatu eta prekarizatuetako langileok ez gaude prest sistemaren jokoa egiten jarraitzeko. Garaia da egunero gure lantokietan pairatzen ditugun diskriminazio egoera guztiak amaitzeko"