Ospakizun bete-betean daude Arraio Irratiko kideak. Proiektuak 15 urte beteko ditu aurten, eta oraingoan ere egitarau zabala prestatu dute urteurrenari lotuta. Larunbat honetan, maiatzaren 15ean, izango da hitzordu bat egitarauaren barruan: irratien arteko bertso saioa egingo dute Putzuzulo gaztetxean. Lau bertsolarik abestuko dute: Markel Eizagirrek, Ane Zuazubiskarrek, Paula Amilburuk eta Mikel Iturriotzek.
18:00etan hasiko da saioa, eta ordubete lehenago, 17:00etan, jarriko dituzte salgai sarrerak. Putzuzulon bertan erosi beharko dira txartelak.
Hurrengo egunean, maiatzaren 16an, Petti abeslariaren kontzertua izango da Putzuzulon. Arraio Irratiaren urteurrenaren harira prestatu dute kantaldi hori ere.