Igande arratsaldeaz geroztik desagertuta dagoen 24 urteko urpeko arrantzale zarauztarraren bila jarraitzen dute larrialdi zerbitzuek Lekeitio inguruko uretan. Ertzaintzaren eta Itsas Salbamenduaren helikopteroak eta Ertzaintzaren, Itsas Salbamenduaren eta Gurutze Gorriaren ontziak ari dira lan horretan eta, gaur goizetik, baita AZTI zentro zientifiko-teknologikoaren barku bat ere. Ontzi hori espezializatua dago batimetrian, eta urpeko kartografiako doitasun handiko sonar bat du.