Aurrera doa Danda Gazte Asanbladak uztailerako prestatutako egitaraua. Aurreko ostegunean, uztailaren 1ean, auzolana izan zen Putzuzulon, eta musika emanaldiak izan ziren horren ostean: Habi eta Ibil Bedi taldeak aritu ziren gaztetxean iluntzean. Aste honetarako ere jarri dituzte hainbat hitzordu Dandako kideek: biharko, uztailaren 8an, pala txapelketa eta zine foruma antolatu dituzte.
Iñurritzako frontoian egingo dute pala txapelketa; dena den, eguraldi txarra eginez gero, Gaztelekuko frontoian jokatzeko aukera izango dela azaldu dute. 15:00etan hasiko dira partidak.
Txapelketan parte hartu nahi dutenek izena eman beharko dute aurrez, eta horretarako, interesdunek mezu pribatu bat bidal dezakete Dandaren Twitter edo Instagram kontuetara. Bestela, danda.gazte@gmail.com helbide elektronikora mezu bat helarazteko aukera ere badago. Gaur amaituko da izena emateko epea, 15:00etan.
Palan jardun ostean, gauean, zineforum saio bat ere izango da Putzuzulon. 22:00etan hasiko da emanaldia, baina oraindik ez dute jakinarazi zein film egongo den ikusgai.