Urtarrileko ohiko osoko bilkuraren amaieran hitza hartu zuten sei herritarrek, udal ordezkariei COVID ziurtagiriaren gaineko "ardura" eta "herritarrak babestea" eskatzeko. Udal taldeetako ordezkari bakoitzari beren iritzia eskatu zieten, eta ziurtagiriak eragindako "diskriminazioaren erantzule" direla esan zieten.
Orduko hartan, alkateak modu ofizialean erantzungo zietela erantzun zien hitza hartu zuten sei herritarrei. Orain, urtarril amaieran hitza hartu zutenek zein beste hainbat herritarrek osatzen duten Zarautz Bizirik taldeak mozio bat sartuko dute biharko udalbatzarrean, gaiak mahai gainean jarrai dezan. Dagoeneko ez dago indarrean toki itxietara sartzeko COVID ziurtagiria eskatzeko araua, baina koronabirusa dela-eta azken bi urteetan hartu diren hainbat neurriren inguruan oraindik ere kezkatuta jarraitzen dute Zarautz Bizirik taldekoek. Beraien helburua da bihar gaiaren inguruan agintariek daukaten jarrera ezagutzea.
Salda tertulia plazan
Urtarrileko udalbatzarrean hainbat herritar elkartu ziren udaletxearen aurrean pleno aretoan zeuden herritarrei elkartasuna erakusteko, eta biharko ere hitzordu berezia prestatu du Zarautz Bizirik taldeak: Salda Tertulia. 19:00etan elkartuko dira Lege Zaharren enparantzan, plenoa hasten den orduan, eta mozioaz iritziak elkarbanatzeaz gain, COVID-19ak eragindako bizipenak partekatuko dituzte. Iragarri dutenez, bertsoak entzuteko eta salda hartzeko aukera ere egongo da. Bertaratzera gonbidatu dituzte herritarrak: "Salda osasungarri batek era guztietako osagaiak behar ditu, zatoz zu ere!".