Euskal Herriko Txistulari Elkartearen eskutik, zilarrezko domina jasoko du Zarauzko bizilaguna den Jose Inazio Elias txistulariak. Asteburuan egin du batzarra elkarteak, eta han berretsi du Eliasi aitortza egitea; izan ere, izatez, aurreko urtean eman behar zioten domina, baina pandemia tarteko, atzeratu egin zuten ekitaldia. Aitortza egingo diotela bai, baina elkarteak oraindik ez du omenaldiaren eguna zehaztu.
Azken urteotan txistuz jotako piezak grabatu eta partiturekin batera eskuragarri jarri ditu horiek Youtubeko Zesteronekua izeneko kanalean; orotara, milatik gora pieza bildu ditu han. Lan horri aitortza egingo dio Txistulari Elkarteak, egin duen lanak "urrea" balio duelako.
Honako lotura honetan irakur daiteke Mailo Oiarzabal kazetariak iazko uztailean Eliasek egindako lanari buruz osatutako erreportajea.