Martxoaren 24rako greba deitu du Ikasle Abertzaleakek. Zein beharretatik abiatuta mobilizatuko zarete?
Gure belaunaldiak ez du ezagutu krisialdian egon ez den unerik. Krisi kapitalistetan, sistemak berregituratu egiten ditu bera sostengatzen duten zimenduak, eta horietako bat hezkuntza da. Gure ustez, azken urteotako hezkuntzaren bilakaera dekadentea izan da, eta dekadentzi horren ondorioak langile klaseko ikasleak jasaten ditu. Dekadentzia horren adibide dira, adibidez, hezkuntzako gastuen —zuzeneko eta zeharkako— gorakada, edota kontrol sozialaren areagotzea.
Horri tiraka ibili gara ikasturte honetan, Hezkuntzaren dekadentzia, ikasleon miseria! kanpainarekin. Hezkuntzaren dekadentziaren aurpegi gordinenak erakutsi nahi izan ditugu horrekin. Gure ustez, ezarri nahi dituzten hezkuntzako lege berriek —LOSU, LOMLOE eta LH plana—, dekadentzia prozesua formalizatu besterik ez dute egiten, eta horregatik aterako gara kalera ostegunean.
Ikasleek jasaten dituzuen arazoak asko direla azpimarratu duzue, eta mobilizatzeko sei arrazoi azaldu dituzue.
Mobilizatzeko sei arrazoi daudela baino, gutxienez sei arrazoi badaudela uste dugu. Batetik, hezkuntzaren garestitzea egitate bat da, eta ez soilik zuzeneko gastuei dagokienez. Zuzeneko gastuak —tasak— goraka doaz, baina zeharkakoak diren gastuak ere goraka doaz, eta, adibidez, hezkuntzaren baitan gertatzen ari den digitalizazio prozesuan hori antzeman daiteke: kasu askotan, eskola ez da gai ikasleei heziketa prozesuak exijitzen dien materiala emateko. Bigarrenik, eskola-uzte datuak goraka doaz, eta are nabarmenagoa da gorakada ikasle proletarizatuenen kasuan.
Bestalde, ebaluazio-sistema erabat klasista dela irizten diogu. Langile klaseko ikasleak dira, oro har, ikasketak behar bezala eramateko zailtasun handienak dituztenak. Kasu askotan, ikasketak lanarekin uztartu behar ditugu; beste askotan, klase partikularrak behar bai baina ezin ditugu jaso, gastu onartezina baita. Oro har, dirua daukanak hezkuntzarako sarbide askoz ere errazagoa dauka.
Era berean, eta digitalizazio prozesuaren aitzakia pean, enpresa handiek gero eta esku hartze handiagoa daukate, eta horien beharren arabera erabakitzen da ikasleek zer ikasiko duten. Horrek erakusten du hezkuntza egokitzapenak egiten ari dela ikasleok etorkizuneko ziklo ekonomikorako behar bezala prestatuta egon gaitezen. Halaber, kontrol sozialerako mekanismoak areagotzen ari direla ikusten dugu, eta gure ustez, horren funtzio nagusia, egungo belaunaldiak kontrol sozialera ohitzea da.
Azkenik, egungo hezkuntza sistemak ikasleon osasun mentala kaltetzen du. Datuen arabera, ikasleen herenak antsietate arazoak ditu, ikasketek eragiten dien presioagatik, besteak beste.
Langile-klasea hezkuntzatik kanporatua izaten ari dela diozue.
Langileria hezkuntza prozesutik kanporatua izaten ari dela diogunean, egiturazko arazo batez ari gara. Tasak eta zeharkako gastuak %50 igo dira 2004az geroztik, eta, horri guztiari, bizitzaren garestitze orokorra gehitzen badiogu, itogarriak dira gastu horiek etxe askotan. Badaude gastuetatik harago doazen beste zenbait motibo ere. Krisiak langile klasearen bizi-baldintzak okerrera eraman ditu eta, horrek guztiak, ikasketa prozesuan eragin zuzena daukala iruditzen zaigu, eta, beraz, hezkuntzarako sarbide erreala ukatu egiten zaio langileriari. Hezkuntzatik kanporatzeak hori esan nahi du: heziketa prozesua behar bezala aurrera eramateko baldintzak ukatzen zaizkiola langileriaren zati handi bati.
Zein da zuek proposatzen duzuen konponbidea?
Hezkuntzaren dekadentzia prozesua, esan bezala, bizi-baldintzen okertze orokorren baitan ulertzen dugu, krisi kapitalistak hezkuntza bera ere zeharkatzen duela, alegia. Horregatik, ez dugu uste erreforma partzialetatik konponbiderik etor daitekeenik. Are gutxiago LOSU, LOMLOE eta LHko erreformen bidez, sistema kapitalistaren beharrak asetzeko diseinatuta daudelako. Gure ustez, indarrak hezkuntza sozialistaren eraikuntzaren norabidean jarri behar dira, eta hori aldarrikatuko dute martxoaren 24an egingo diren manifestazioek.
Deialdi honetara begira, zein ekintza egin dituzue eta nola antolatu zarete azken aste hauetan?
Euskal Herriko hamaika txokotan egin den bezala, hemen ere ikasturte osoa igaro dugu eskualdeko gabezi nagusienak zein diren aztertzen eta horien ondorioak azaleratzen. Eskualde honetan kasurik adierazgarrienetakoa klase partikularrena da. Hezkuntzaren dekadentziaz ari garenean, edukiak emateko duen gaitasun ezaz ere ari gara, eta hori erakusten dute egin genituen inkestetatik jasotako emaitzek: ikasleen erdiak baino gehiagok jaso ditu klase partikularrak, eta ikasturte osoa pasa dugu horrek ikasle langileei eragiten diena salatzeko kanpaina aurrera ematen.
Greba egunari dagokionez, azken aste hauetan lanean ibili gara unibertsitateko zein batxilergoko ikasleak. Grebaren nondik-norakoak azaltzeko eta eztabaidatzeko batzarrak egin ditugu, eta propagandarako lan-egunak antolatu.
Donostian, Bilbon, Gasteizen eta Iruñean deitu dituzue manifestazioak.
Martxoaren 24an bertan autobusa antolatu dugu, Zarauztik Donostiako Ibaeta kanpusera. Bertan, 12:00etan abiatuko den mobilizaziora batuko gara. Egoeraren larritasunak premiazkoa egiten du egun hori, eta parte hartzera animatzen dugu ikasle oro. Interesa duen oro sare-sozialen bitartez jar daiteke gurekin harremanetan.