Aritz Aranburu surflariak eta Shelter Surf eskolak antolatuta, Zarautz 4Teens txapelketaren seigarren edizioa jokatu zuten asteburuan Borghetto parean. Surf egokituko eta 14 urtetik beherakoentzako txapelketaren bueltan, baina, bestelako jarduerak eta ekitaldiak ere egin zituzten: jasangarritasunak duen garrantziaz jabetzeko gaztetxoentzako tailerrak, ingurumenari buruzko ginkana, skate erakustaldia... Eta zuzeneko musikak ere izan zuen lekua: Martin de Martek kontzertua eman zuen larunbat iluntzean.
Asteburuak emandakoarekin "oso gustura" daudela ziurtatu du Aranburuk, dena alde izan zutela. "Olatuek eta eguraldiak asko lagundu ziguten, eta gaztetxoek dena eman zuten; horrek ematen du poz handiena. Familia giroan datza surfa, eta horri gehituz gero txapela irabazteko parte hartzaileak erakutsi zuten gogoa... Ezin da gehiago eskatu. Maila oso altua ikusi genuen hasieratik, bai zarauztarren artean, bai kanpotik etorritakoen artean; oso lehia polita. Harrobi oso ona dago, eta merezi du txapelketa antolatzeak beraientzat".
Sailkapenak
Honela gelditu ziren txapelketako sailkapenak, kategoriaz kategoria:
14 urtetik beherako mutiletan:
- Dylan Donegan
- Alvaro Casanova
- Makoa Gomez
- Alejo Valido
14 urtetik beherako nesketan:
- Nora Alvarez
- Carla Morera
- Adriana Hidalgo
- Ane Loreiro
Surf egokituan, mutiletan:
- Unax Esnaola
- Markel Ugarte
Surf egokituan, nesketan:
- Mireia Cabañes
- Ayala Garcia
10 urtetik beherakoetan, taldeka:
- Nahia Calderon, Gael Rivera eta Lukas Iribar