Maiatzean eskuratu zuen CrossFit Games 2022 txapelketarako txartela Zarauzko taldeak, eta abuztuaren 3an hasi eta atzo amaitu zen lehia, Amerikako Estatu Batuetako Madison hirian.
Alex Anasagastik, Pablo Cazalisek, Ione Taintak eta Nienke Van Overveld holandarrak osatu dute lehiaketarako taldea, eta 27. postua eskuratu dute taldekako sailkapenean. 341 puntu eskuratu dituzte Zarauzko ordezkariek mundu mailako txapelketan, eta 1052 punturekin, AEBetako CrossFit Mayhem Freedom taldea izan da txapeldun.
Zaragozan ere emaitza bikainak
Mundu mailako txapelketarik ez, baina Cierzo Fitness Challenge proban lehiatzen izan dira bi zarauztar asteburuan, Zaragozan (Espainia). Erdi mailako (Intermedio izenekoa) txapelketan lehen postuan sailkatu zen Ander Pablos eta Ander Matas azkoitiarrek, Nestor Hernandez tolosarrak eta Lierni Osa zarauztarrak osatutako taldea.
RX mailan, erdi maila baino bat goragokoan, ere izan zen Zarauzko ordezkaritza, eta lan ezin hobea egin zuten horiek ere; izan ere, Joanes Otamendi, Aitzol Galarraga eta Ander Arteaga azpeitiarrek zein Erika Sanchez zarauztarrak bigarren postua eskuratu zuten.