Atzo gauean jokatu zen Bertsolari Gazteen Lizardi Sariko lehen kanporaketa saioa, eta Aner Peritz izan zen irabazlea, 217 punturekin. Gainerako zazpi bertsolariekin alderatuta, askoz puntu gehiago lortu zuen zarauztarrak. Gorka Pagonabarraga duragarra gerturatu zitzaion gehien, 208,5 punturekin; beste parte hartzaileak 200 puntutik behera geratu ziren.
Saioa bakoitzeko irabazlea zuzenean sailkatzen da irailaren 2an Modelo aretoan jokatuko den finalerako, eta gainerako lau txartelak, berriz, bi egunetan puntuazio gehien lortzen duten lau bertsolarientzat izango dira.
Gaur, bigarren kanporaketaren txanda izango da; Musika Eskolako aretoan izango da saioa, 22:00etan, doako sarrerarekin. Oholtzara igoko diren bertsolariak honako hauek izango dira: Naia Arrizabalaga (Azkoitia), Aitor Tatiegi (Oñati, Gipuzkoa), Andoni Rekondo (Hernani, Gipuzkoa), Irati Alcantarilla (Urruña, Lapurdi), Libe Goenaga (Getaria), Ane Beloki (Legazpi, Gipuzkoa), Oier Etxeberria (Azpeitia) eta Xabat Illarregi (Leitza, Nafarroa).
Lehen kanporaketako sailkapena
- Aner Peritz 217 puntu
- Gorka Pagonabarraga 208'5 puntu
- Haizea Arana 194'5 puntu
- Peru Abarrategi 194 puntu
- Aimar Sorazu 186'5 puntu
- Idoia Granizo 176 puntu
- Enare Muniategi 175'5 puntu
- Ekain Tolaretxipi 162 puntu