Hezkidetza Foroak antolatuta, Ostiral honetan, Indarkeria Matxistaren Kontrako Egunean, Zarauzko ikastetxeetako ikasle eta irakasleek elkarretaratzea egingo dute Lege Zaharren enparantzan. Ohi bezala, Hezkidetza Foroak antolatu du egitasmoa, eta herriko zazpi ikastetxeetako 1050 ikasle inguru elkartuko dira 11:15etik aurrera.
Elkarretaratzean ikastetxeetako ordezkariek indarkeria matxistaren aurkako manifestua irakurriko dute, eta bertan guztientzako tratu ona aldarrikatuko dute. Bukatzeko, gaiaren inguruan Aner Peritz bertsolariak sorturiko bertsoa abestuko dute guztiek batera.
Azaroaren 25eko ekitaldiak arratsaldean jarraituko dute. Indarkeria matxistari aurre egiteko sozialismoa eraiki lelopean, Urola Kostako Itaiak mobilizazioa egingo du 18:00etan Lege Zaharren enparantzan. Ordu erdi geroago, 18:30ean, Emakumeen* Etxetik abiatuta, Indarkeriaren kontrol kateetatik askatu! manifestazioa egingo dute Morroxkak eta Zarauzko Bilgune Feministak deituta.