Gaur zortzi itxiko dute joan den azaroaren 25az geroztik Sanz Enea kultur etxean bisitatu daitekeen Ramon Serras Nazioarteko Argazki Mostra. 30. edizioa du eta ohi bezala, prestigio handiko argazkilarien lanek osatzen dute erakusketa. Urteurren borobilerako Juan Aldabaldetreku, Wilco Westerduin, Eli Garmendia eta Felix Sanchez Arrazolaren argazkika bildu dituzte, zehazki, eta orotariko lanak aurkeztu dituzte.
Gauzak horrela, Aldabaldetrekuk, Madrilen bizi den argazkilari zarauztarrak, modako argazkilaritza eta erretratugintza lantzen duten irudiak ekarri ditu; Eli Garmendia tolosarrak bere buruari egindako autoerretatuak bikoiztuta edota hiruzkotuta; Jatorriz herbeherearra den Wilco Westerduin euskal heritarrak inguruko paisaiak, Zumaiako Flyscha, baita zenbait eraikin zahar ere; Felix Sanchez Arrazola oñatiarrak, azkenik, kirol fotokazetaritza jorratzen duenez gero, atletismo eta lasterketa mundutik gorde dituen hainbat momentu paratu ditu.
Esan bezala, datorren asteko igandera arte izango da lan horiek guztiak ikusteko aukera, egunero, 18:30etik 20:00etara.
