Betiko ohiturei jarraituta osatu dute gaurko goizeko egitaraua. Frontoi Txikiko Goiztiarren ekitaldian adin guztietako herritarrak elkartu dira, pilota jaialdiaz gozatzeko.
Munoa plaza ere jendez bete da 12ak jotzerako. Eguzkiak gogor jotzen zuen arren, jendetza bertaratu da Munoara, Alprojaren antzezlana ikusteko. Zarauzko antzerki taldekoek Jainkoen Laratza izeneko lana eskaini dute gaurkoan, eta ohi bezala harrera bikaina egin diete herritarrek.
Bitartean, herritarrek jan-edanerako aprobetxatu dute goiz eguerdia, eta asko izan dira trikitiaren eta panderoaren doinuetan dantza egitera animatu direnak. Musika plazan, esaterako, urtero bezala erromeria izan da trikitilari, txistulari eta dultzaineroekin.
Gaurko eguneko beste hitzordu berezitako bat orga txapelketa izaten da, eta asko izan dira haien karrotxoekin plazara hurbildu direnak. Sari banaketa eginda, festaz gozatzen jarraitu dute zarauztarrek. Eguzkiaren beroari, umore onez erantzun diote zarauztarrek, eta festa giro ederra sortu da kalean. Arratsaldean ere izango da zer egin eta zertaz gozatu Zarauzko Euskal Jaian.
Hona hemen arratsaldeko egitaraua:
- 17:30. Musika Plazatik Iñurritzara kalejira, trikitilari, dultzainero eta txistulariekin.
- 18:00. Txosnen irekiera, Malekoian, Arribati izozki dendaren parean.
- Ordu beran, Iñurritzan, haurrentzako jolas mitologikoak eta Montessori gunea.
- 18:30. Iñurritzako zelaian, erromeria Bide Batera taldearekin.
- 20:00. Kontzertuak txosnetan: Baloom Frame eta Euskoprincess. Ondoren DJ Landermarez eta DJ Tikka Masala.
- Ordu berean, Iñurritzan, Lizarrako Larrain Dantza herrikoia dultzaineroekin.
- 20:30. Kalejira, Iñurritzatik Musika Plazara.
- 22:00. Munoan, dantzaldia Oxabi taldearekin.
- 22:30. Musika Plazan, erromeria trikitilariekin.