EHKS Euskal Herriko Kontseilu Sozialista abenduaren 16an aurkeztu zuten erakunde politiko gisa Eibarko (Gipuzkoa) Astelena pilotalekuan 1.500 lagunen aurrean, eta herriz herri aurkezpenak egiten ari dira orain. Gipuzkoan, Zarautzen egin zuten lehenbiziko saioa, joan den larunbatean, eta hainbat herritarren interesa piztu zuen Gaztelekuan egindako aurkezpenak.
EHKSren jardunaren nondik norakoak azaldu zituzten bertan, eta besteak beste, azpimarratu zuten "Mugimendu Sozialistaren bozeramailea, erreferente politikoa, eta antolakunde nagusia" izango dela erakunde sortu berria eta helburu nagusia izango duela "langileen artean komunismoa hegemonikoa izatea".