Paris Texas edota El cielo sobre Berlin filmengatik ezaguna den Wim Wenders zinegile alemaniarrak zuzenduriko azken lana izango da ikusgai gaur arratsaldeko zinema saio originalean: Perfect Days. Astearteetan egin ohi duten saio originalaren barruan eskainiko dute, eta, ondorioz, jatorrizko hizkuntzan eskainiko dute ikus-entzunezkoa gaztelaniazko azpi idatziekin. Ohi bezala, 19:30ean hasiko da eta emankizuna.
Filmari erreparatuta, Hirayama pertsonaia nagusiaren eguneroko ohiturak izango ditu ardatz. Tokion(Japonia) komun garbitzailea da eta gozatu egiten du daraman bizitza xumearekin. Dena den, Hirayamak izango ditu bere egunerokoan eragina izango duten gorabeherak. Kôji Yakusho aktore japoniarrak gorpuztu du protagonista eta egindako lan onak aktore onenaren saria irabazteko balio izan zion Canneseko jaialdian. Horrez gain, film onenaren sarirako izendatu zuten Perfect Days, nahiz eta azkenean ez zuen irabazi. Oraindik irabazi dezakeena atzerriko film onenaren Oscar saria da, hautagaietako bat baita martxoan egingo duten zinemako sari banaketa garrantzitsuenean.