Zarauzko Udalak jakinarazi du zein izango den Santa Klara Komentua birgaitzeko eta eraberritzeko obraren exekuzio proiektua idatziko duen enpresa. Zehaztu duenez, joan den astean esleitu zion horretarako kontratua Donostiako UR Arkitektura SLPri 757.464,19 euroan (BEZ barne), lehiaketa publikoa irabazi ondoren.
Udalak azaldu du, halaber, Santa Klara birgaitzeko exekuzio proiektua idazteaz gain, ondoren etorriko diren obren zuzendaritza teknikoa ere egin beharko du lehiaketa irabazi duen estudioak. Horrez gain, gogoratu du azpiegitura soziokulturala izango dela Santa Klara etorkizunenan eta Donostiako enpresak garatuko duen proiektuak oinarri izango dituela Santa Klara LAB prozesu partehartzailean jasotako ekarpenak.