Aiako XX. Txakolin Egunaren bueltan, Gizonezkoen Gipuzkoako Harri Txikien Txapelketa jokatuko dute bihar Aian. Guztira bost harrijasotzaile ariko dira biharkoan, denak zarauztarrak: Xabat Olaizola, Imanol Royo Lartain, Hodei Iruretagoiena Izeta IV.a, Mikel Lopetegi Urra eta Iraitz Arruti.
17:00etan hasiko da txapelketa, baina horren aurretik ere izango da zer gozatua Aian. 11:30etik hasita, Getariako txakolina dastatzeko aukera izango dute Aiako plazara gerturatzen diren guztiek, baita txekor haragi pintxoak jateko ere. Horrez aparte, 14:00etan Gazte Asanbladak txosna zabalduko du. Kirol lehia amaitu ostean, Lajak eta Lutxurdik izango dute guztiak dantzan jartzeko ardura, erromerian.