Zarauzko Udaleko Berdintasun sailak antolatuta, Latidos psikologia zentroak lau saio egingo ditu, jaio aurreko eta berritako haurren heriotzagatiko dolua lantzeko laguntza talde gisa. Maria Jesus Jimenez psikologoak gidatuko du taldea, eta, bi asteartetik behin elkartuko da. Etzi, apirilaren 16an, egingo dute lehenengo saioa eta beste hirurak hilaren 30ean eta maiatzaren 14an eta 28an egingo dituzte. Aurrez, gaiari lotutako Esku Hutsik elkartearen mahai ingurua eta argazki erakusketa ere antolatu zituen Berdintasun sailak Emakumeen Etxean.
Etzitik martxan izango den laguntza taldeari erreparatuta, atzera berriro, Jimenezek azaldu du ez dagoela emakumeei soilik zuzenduta eta, ondorioz, gizonezkoak ere gonbidatuta daudela: "Espazio irekia da, eta aitak ere ongietorriak dira. Gertaera horietan emakumeak dira foku nagusiak, baina gizonek ere sufritzen dute", zehaztu du.
Jimenezen hitzetan, umeen heriotza "dolu desautorizatua" da gizartean. Halakoetan, gainera, umearekin batera "ilusio, emozio eta etorkizuneko plan asko hiltzen dira". Hala, "min hori arintzeko laguntza" da psikologoak eskainiko duena.
Saioetan parte hartzeko ezinbestekoa da aurrez izena ematea, eta, horretarako Berdintasun sailarekin harremanetan jarri behar da, Emakumeen Etxean bertan (Nafarroa kalea 3C, behea), berdintasuna@zarautz.eus helbidera idatzita edo 943-00 51 17 telefono zenbakira deituta.