Zarauzko ikur gastronomikoa izateko sortu zuten iaz Toldotxo pintxoa. Herriko ostalaritza eta merkataritza dinamizatze aldera, udalak bultzatutako proiektua izan zen, Zurekin ostalari elkartearen eta Argiñano jatetxearen laguntzarekin. Orain, Donostiako Kursaal jauregian izango den Euskal Herriko XII. Pintxo Txapelketako protagonistetako bat izango da.
Astelehenetik asteazkenera jokatuko da lehiaketa, urriaren 23tik 25era, baina 'Toldotxo' ez da lehian izango. Txapelketa ikustera bertaratzen direnei dastatzeko emango diete, 2016ko sarituekin batera; hau da, Hondarribiko Sardara jatetxearen Barbalada pintxo txapelduna eta Hondarribiko Gran Sol jatetxeko Lingote de pato a la naranja txapeldunordea.
Toldotxoren osagai nagusia legatz frijitua da. Patatazko oinarri baten gainean doa, eta bere inguruan, ogi eta urdaiazpiko iberiko birrindua du, hodar hori irudikatuko lukeena. Legatzak ali-oli saltsa suabea darama gainaldean, eta piper berde zinta batzuk alboetan, hondartzako toldoen itxura emateko.