Salbatore Mitxelena Ikastolak hiru saio antolatu ditu Zaindu maite duzun hori zikloaren barruan. Abenduaren 19an, Euskara familia giroan goxatuta etxekoagoa, gureagoa delako hitzaldia eskaini zuen Paula Casaresek, eta aste honetako saioan, Ane Ablanedo Bigarren Hezkuntzako eta Unibertsitateko irakasleak hartuko du hitza.
Urtarrilaren 31n, osteguna, izango da hitzaldia; Gure askatasun preziatua izenpean. Ablanedok helduek haurrei ezarri beharreko mugez eta askatasunaz hitz egingo du: "Askatasunaren printzipioen arabera gidatua denean hartzen du bizitzak benetako duintasuna. Haurren askatasunaren arduradun bezala, finki zaindu behar dugu heldiok tresna preziatu horren kudeaketa".
18:00etan hasiko da osteguneko saioa, Ikastolako aretoan. Bestalde, otsailaren 14an ere jarraipena emango diote zikloari; Haurtzaroaren garrantzia bizitzan: elikaduraren eta loaren bidez ongizatearen haziak hitzaldia eskainiko du Miren Camisonek.