Ostegun honetan hasiko da aurtengo Kalerki Antzerki Jaialdia, 26. urtez jarraian. Hala, igandera bitartean, antzezlanak, musika emanaldiak, akrobaziak edota dantza ikuskizunak izango dira kalean. Edukiera mugatua izango dute hiru saiok; hain zuzen, Calor, Vida eta Benditas emanaldiek.
Ostegunean izango da Calor, eta bi saio eskainiko dituzte Torre Luzea parkean, 21:30ean eta 23:00etan. Bertaratzeko asmoa dutenek ostegunean bertan jaso beharko dituzte txartelak, 17:00etatik aurrera Modelo aretoan.
Vida emanaldia ostegunean eta ostiralean eskainiko dute, Villa Manuelako frontoian, 22:00etan. Ostegunean joan nahi dutenek egun horretan eskuratu beharko dituzte sarrerak, 17:00etan Modelon, eta ostiralean joateko asmoa dutenek, aldiz, ostiralean, ordu eta leku berdinean.
Benditas ikuskizunari dagokionez, hiru emanaldi izango dira larunbatean, 18:30ean, 19:30ean eta 20:30ean. Egunean bertan hartu ahalko dira txartelak, 17:00etatik aurrera, Modelon.
Antolatzaileek jakinarazi dutenez, ez zaie sarrera baimenduko txartelik ez dutenei.