Oraingoz ez dute baieztatu koronabirus kasurik Urola Kostan, baina urrun zirudiena gerturatu egin da, bai behintzat neurriei dagokienez: Gipuzkoako eta Bizkaiko ikastetxe guztiak ixtea erabaki berri du Eusko Jaurlaritzak. Bihar, beraz, ez da zabalik egongo ez haur eskolarik, ez ikastetxerik, ez unibertsitaterik ikasleentzat. Arabakoak itxi zituzten aurrena, eta orain zabaldu egin du erabakia Eusko Jaurlaritzak. Irakasleek, ordea, lanean jarraituko dute, ikasleek ikastetxetik ikasten jarrai dezaten materiala prestatzeko.
Nekane Murga Osasun sailburuak jakinarazi du erabakia prentsaurrean 13:00etan. Esan du “umeek birusa zabaltzeko erraztasuna dutela”, eta birusa gehiago zabaltzea ekidin behar dela.