Euskotren eta Eusko Label ligetako bandera preziatuenetakoa da Zarauzkoa. Berezia da bi jardunalditara jokatzen delako, eta, ligaren azken txanpan egiten denez (azken bandera da Euskotren ligakoentzat), askok Kontxarako prestaketa moduan hartzen dute. Oso ezberdinak izan dira atzoko eta gaurko jardunaldiak; atzo giro haizetsuari egin behar izan zioten aurre arraunlariek eta hori denboren arteko aldeetan geratu zen islatuta. Gaur, berriz, itsasoa bareago egon da eta haizeak ez du indar berezirik izan. Aurtengoan Oriok eta Hondarribiak irabazi dituzte ikurrinak, eta Oriok, bandera irabazteaz gain, ligako koroa ere eskuratu du.
Oraindik denboraldia amaitu ez den arren, oraingoz, irabazi zezaketen guztia irabazi dute Orioko emakumezkoek. Dotore amaitu dute gaur liga gainera, estropadan nagusitasuna erakutsita. Karkara.eus atarian dago irakurgai gaurko estropadako kronika.
Hondarribia izan da asteburuko beste garailea. Atzoko jardunaldian nagusi izan zen, eta gaur ohorezko txanda laugarren postuan amaitu badu ere, atzo egindako denborari esker irabazi du bandera. Gainera, ligako lehen hiru postuetan sartzea lortu du, beraz, muturra sartu du orain arte Urdaibai, Santurtzi eta Orioren arteko lehia zirudienean. Gaur gaurkoz, hirugarren postuan dago sailkapen orokorrean Ama Guadalupekoa.
Honela dago gaurko estropadaren ostean Eusko Label ligako sailkapena:
| 1 | SANTURTZI TRANSPORTES Y GRUAS AGUADO | 114 |
|---|---|---|
| 2 | ORIO ARRAUNKETA ELKARTEA | 109 |
| 3 | GO FIT HONDARRIBIA | 107 |
| 4 | BERMEO URDAIBAI AVIA | 107 |
| 5 | DONOSTIARRA AMENABAR | 98 |
| 6 | ZIERBENA BAHIAS DE BIZKAIA | 97 |
| 7 | CABO | 78 |
| 8 | LEKITTARRA ELECNOR | 50 |
| 9 | ONDARROA CIKAUTXO | 49 |
| 10 | ZARAUTZ BABYAUTO | 47 |
| 11 | CR ARES | 47 |
| 12 | KAIKU VUSA | 33 |
Santurtzin izango dute arraunlariek ligako hurrengo hitzordua. Zalantzarik gabe, une gozoan iritsiko dira Soterakoak etxeko estropadara.
