Atzo zendu zen Oskar Mutiozabal Txabillo, 50 urte zituela. Herriko festak girotzeaz arduratu izan da Txabillo ume-umetatik, haren aitaren urratsei jarraika. Otsailean zendu zen aita, Pepe Txabillo.
Hamazazpi urte zituenean hartu zuen Oskar Txabillok buruhandia lehenengo aldiz sorbalda gainean. Handik gutxira, taldeko arduradun egin zen, eta hala izaten jarraitu du harrezkero. 2018ko sanpelaioetan aitortza jaso zuen: elkarte gastronomikoek erraldoien eta buruhandien taldea omendu zuten ekainaren 25eko gauean egin ohi den ekitaldian. Ohorezko makila, berriz, haren aitari eman zion Xabier Txurrukak. Hain zuzen ere, urte hartan bertan HITZAk txabillotarren jarduna azaltzen zuen erreportajea egin zuen. Hemen dago irakurgai. Alkateak gogoan izan zuen atzo Mutiozabal sare sozialetan. "Bihotz minez, agur Oskar", mezuarekin batera, sanpelaioetako suziriaren irudia jarri zuen.
Txabillori azken agurra emateko hileta elizkizuna gaur izango da, zazpietan Andra Mari Zeruratzea parroki elizan. Gaur egungo edukiera murrizketak direla eta, eliza barruan egon daitekeen jende kopurua mugatua izango da.