Asteburu honetan Merkatu Plazako bigarren solairura gerturatzen denak Zubiak eraikitzen izeneko argazki erakusketa aurkituko du. Ordea, horma nagusian erakusketa horretakoa ez den beste lan bat dago eskegita: Juan Luis Mendizabal Mendi margolariaren oroimenez Artezaleak elkartekoek egindako collage handi eta ikusgarria, hain zuzen.
Gabonetako erakusketarako prestatu zuten Manu Muniategiandikoetxea irakasleak eta haren pinturako ikasleek, dozenaka margolan txiki elkartuz osatuta. Mendik hondartza, itsasoa, Getariako San Anton mendia... islatzen zituen sarri bere lanetan, eta asko du hortik haren omenez egindako lanak ere.
Otsaila gerturatzen ari den honetan, berdura plazako horman jarraitzen du, erakusketa aretoko protagonista nagusi.