Lan hitzarmen "duina" aldarrikatzeko grebari ekin diote gaur Aritzbatalde kiroldegiko langileek. Soldatak izoztea eta lanaldiak murriztea egozten dizkiote kiroldegia kudeatzeaz arduratzen den BPXport enpresari, eta langileek egoera konpondu dezaten exijitu diote bai enpresari, baita udalari ere.
06:15etik kiroldegiaren kanpoan egon dira bertako langileak, pankarta eskuetan hartuta. Ez dute zerbitzurik eman, eta HITZAri azaldu diotenez, ez da aparteko arazorik sortu. 11:30ean udaletxearen aurrean egin dute protesta, eta arratsaldean, 18:00etan, karabana zaratatsua egingo dute herriko errepideetan zehar.
Langileen borroka ez da gaurkoarekin amaituko; bihar, datorren astelehenean eta asteartean ere greba egingo dute.
