Pandemiak eragindako bi urteko hutsartearen ondoren bueltan da Zarauzko Garagardo Azoka. Aski jakina zen zarauztarrak eta bisitariak gogotsu zeudela, eta hala erakutsi zuten lehen orduetatik. Munoako karpa ireki bezain pronto bete ziren mahaiak, eta ezinezkoa agian ez, baina zaila izan zen, bai, leku bat aurkitzea. Bitartean, askok eta askok zutik edan zituzten beraien edariak.
Garagardo horia, beltza edo gari-garagardoa; presiokoa edo botilan. Denetik edan izan zen atzo Garagardo Azokaren lehen orduetan. Pitxerrak eskuetan, batetik bestera aritu ziren bertaratu zirenak.
Ohikoa den bezala, irekierarekin batera omenaldirako txanda ere izan zen. Oraingo honetan, Alustiza Bidaiakeko Gabino Gonzalez Txabarri omendu du Zarauzko Rugby Taldeak, azokaren antolatzaileak. Hainbat eta hainbat bidaiatan eraman ditu Gabinok rugbyko jokalariak, eta honen jarrera ona eskertu nahi izan du klubak omenaldi honen bidez.
Musikaren txanda ere izan zen atzokoan. Serious Business blues taldeak jarri zuen musika Munoako karpan.
Garagardo Azokak astelehenera arte jarraituko du martxan.