Hondartzako Futbol Txapelketako hamargarren jardunaldia jokatu zuten atzo eguerdian. Guztira, hamalau partida izan ziren jokoan, eta txapelketa azken faseetan sartzera doala kontuan izanik, norgehiagoka borrokatuak ikusi ahal izan ziren kanpo guztietan. Baita jokaldi ederrak utzi ere, golekin eta geldiketa paregabeekin.
Lehiarako eta irabazteko goseaz haraindi, atzoko jardunaldiak ukitu sentikorra izan zuen. Izan ere, partidak jokatzen hasi baino ordu erdi lehenago aurreko astean zendutako Joxe Mari Lertxundi Azpiazu Txema izan zuten gogoan. Omenaldi xumea egin zioten plieroetako antolakuntzan aritutako boluntarioari lokalaren ondoan.
Datorren igandean, martxoaren 5ean, jardunaldi berri bat izango dute, 09:00etatik aurrera.