Gaur da SKAPAko jaien azken eguna, eta Plaza Gorrian giro paregabea dago goizetik. Izan ere, 10:30ean hasi da Patxi Iruretagoienaren X. Marmitako Lehiaketa, eta aurten talde mordoa aritu da lehian: hogeita hamar taldek eman dute izena.
Umore onean eta musika alaiak lagunduta egin dituzte lanak, eta 14:00 aldera aurkeztu dituzte platerak. Gainerakoa –20 lagun ingururentzako marmitakoa– herri bazkarian jango dute denen artean. 500 lagunek eman dute izena bazkarirako, eta 15:00etan hasiko dira sabelak betetzen Plaza Gorrian bertan.
Bazkalostean zuzeneko musika egongo da, eta sari banaketak egingo dituzte: orduan jakingo da zein den marmitako txapelketako irabazlea.
Mahaitik altxatzean, poteo girotua egingo dute auzoan barrena, 22:00etan bertso saioa izango da puntako bertsolariekin, eta aurtengo jaiak amaitzeko, etxeko talde batek eskainiko du erromeria gauerditik aurrera: Fan & Go taldeak.