Itsaspeko irudiek protagonismo berezia izango dute Zarautzen datozen hiru asteetan; izan ere, gaur abiatuko dute Cimasub Itsaspeko Zinemaren Nazioarteko Zikloa. Ekimena 14. aldiz iritsiko da Zarautzera eta herriko ikastetxeetako 10 eta 12 urte arteko ikasleek inauguratuko dute; izan ere, haiei zuzenduriko Txikizikloa izango da jaialdiko lehenengo jarduera. 296 ikasle izango direnez, bi saiotan banatuta egingo dute, Modelon: 09:30ean, lehenengoa, eta 10:45ean, bigarrena.
Arratsaldean, berriz, hilaren 29ra arte ikusgai izango den argazki erakusketa zabalduko dute 17:00etan, Merkatu Plazako lehenengo solairuan, eta, Modelon, lehenengo film laburrak eta dokumentala eskainiko dituzte 19:00etatik aurrera.
Hauetxek dira gaur emango dituzten lanak:
- Film laburrak: Night Flight. Mantas in the Night, Emerald Sanctuary, Tiempo, The silent invasion of the mediterranean sea, Estres, Itsaso Bizia, Underwater Komodo eta Veo veo.
- Dokumentala: The Shark with a Thousand Names.
Guztiak ere maila handiko lanak dira; izan ere, joan den azaroan Donostian egin zuten Cimasub jaialdiko nazioarteko lehiaketan saritu zituzten, nahiz eta ez ziren irabazleak izan. Horiek hilaren 28ko, asteazkena, azken saioan emango dituzte.