Herenegun atxilotu zuten, eta gaur igaro da da Espainiako Auzitegi Nazionaletik Ekhine Eizagirre preso ohi zarauztarra. Aske utzi ditu Ismael Moreno epaileak Eizagirre eta harekin batera atxilotutako Kepa Arkauz eta Imanol Jaio, baina, hainbat hedabidek jakitera eman dutenez, "ikerketapean" jarraitzen dute "helburu terroristekin armak eta lehergailuak edukitzeagatik". Kautelazko hainbat neurriri jarraitu beharko diete hirurek: ezingo dute espainiar estatutik atera eta epaitegietara azaldu beharko dira astero.
Espainiako Auzitegi Nazionaleko Ismael Moreno epaileak sinatu zuen Eizagirre eta beste biak atxilotzeko autoa, Ertzaintzak 2019an Arraia-Maeztun (Araba) atzemandako “zulo” batekin lotura dutelakoan.
19:30ean ongietorria
Deia zabaldu dute sare sozialen bidez Eizagirreri ongietorria egiteko. 19:30ean finkatu dute hitzordua, Musika Plazan. Herenegun eta atzo ere mobilizazio handiak egin dituzte Zarautzen atxiloketak salatzeko.